प्यूठान : मदन भण्डारी राजमार्ग अन्तर्गत पर्ने गुल्मीको सिमलटारीदेखि प्यूठानको मच्छिसम्मको सडक कालोपत्र हुने भएको छ । केही वर्ष रोकिएको उक्त खण्डको कामले यसवर्षदेखि निरन्तरता पाउने भएपछि यस क्षेत्रका स्थानीय उत्साहित भएका छन् ।
गुल्मीको मदाने गाउँपालिकास्थित सिमलटारीहुँदै प्यूठानको झिमरुक गाउँपालिकाको सौतामारेदेखि मच्छि बजारसम्मको ३१ दशमलव ८ किलोमिटर सडक कालोपत्र हुने भएको हो । मदन भण्डारी राजमार्ग आयोजना निर्देशनालय ललितपुरले उक्त सडक कालोपत्र गर्नका लागि एक अरब ९२ करोड रुपैयाँ बरावरको बोलपत्र आव्हानको सूचना प्रकाशित गरिसकेको छ ।
यस योजना अन्तर्गत सात मिटरको दुईतर्फी सडक निर्माण हुने निर्देशनालयका निर्देशक अशोक तिवारीले जानकारी गराए । ‘यो बहुवर्षिय योजना हो’,तिवारीले भने,‘तीन वर्षभित्र उक्त आयोजना पुरा गर्ने लक्ष्य छ ।’ वर्षौ अघिदेखि चर्चामा रहेपनि सडक निर्माणको कामले गति नलिएपछि यस क्षेत्रका स्थानीयले सडक बन्नेमा ढुक्क थिएनन् । तर, टेण्डरको सूचना प्रकाशन भइसकेपछि स्थानीयमा आशा जागेको हो ।
गुल्मीका सांसद् एवं पूर्वमन्त्री प्रदिप ज्ञवाली, गोकर्ण विष्ट, अर्घाखाँचीका सांसद् एवं पूर्व मन्त्री टोप बहादुर रायमाझी र प्यूठान सौतामारे निवासी एमाले नेता सूर्य थापाको विशेष पहलमा दुवै जिल्लालाई समेट्ने गरी सडक निर्माण गर्ने सहमतीपछि योजनाले गति लिएको हो ।
यस सडक निर्माणपछि प्यूठान, गुल्मी र अर्घाखाँचीको चहलपहलमा थप बृद्धि हुने झिमरुक गाउँपालिका वडा नम्वर १ सौतामारेका वडा अध्यक्ष धुर्वराज खनालले बताए । ‘तीन जिल्लामा रहेका पर्यटकीय स्थलहरुको समेत प्रवद्र्धनमा यसले टेवा पुग्ने देखिन्छ’,उनले भने,‘ग्रामीण अर्थतन्त्रको विकासमा मदन भण्डारी राजमार्ग कोशेढुंगा सावित हुने आशा गरिएको छ ।’ उनले सडकलाई स्थानीयको आय आर्जनसँग जोड्नुपर्ने समेत धारणा राखे ।
सडक क्षेत्रमा पर्ने घर टहराहरुलाई मापदण्ड अनुसार मुआब्जा दिने आयोजनाले जनाएको छ । आयोजनाले माग गरे अनुसार सडक क्षेत्रमा पर्ने घर टहरा र जग्गाको क्षेत्रफलको विवरण पठाइएको झिमरुक गाउँपालिका प्रमुख प्रशासकीय अधिकृत शुवास रिजालले जानकारी दिए । मदन भण्डारी राजमार्ग अर्घाखाँचीहुँदै जाने वा प्यूठान हुँदै भन्ने विवादले केही समय यसले गति लिन सकेको थिएन् । गुल्मीका सांसद् एवं पूर्वमन्त्री प्रदिप ज्ञवाली, गोकर्ण विष्ट, अर्घाखाँचीका सांसद् एवं पूर्व मन्त्री टोप बहादुर रायमाझी र प्यूठान सौतामारे निवासी एमाले नेता सूर्य थापाको विशेष पहलमा दुवै जिल्लालाई समेट्ने गरी सडक निर्माण गर्ने सहमतीपछि योजनाले गति लिएको हो ।
अर्को रुट अन्तर्गत सन्धिखर्क—भण्डार—रतनमारे—गोखुंगा सडक अन्तर्गत २७ दशमलव २६ किलोमिटर सडक कालोपत्र हुने छ । यस रुटका लागि एक अरब ७२ करोड बजेट विनियोजन भएको छ । गोखुंगाहुँदै गएको सडक र सौतामारे मच्छिहुँदै गएको अर्को सडक प्यूठान नगरपालिकाको मरन्ठानामा पुगेर मिसिने छन् । मच्छिदेखि बाग्दुलासम्मको क्षेत्रमा अर्को महत्वपूर्णको योजना बाग्दुला—भिमगिठे सडकले सडक कालोपत्र गर्ने छ । - (बुटवल टुडे)
.jpg)
.jpg)
