प्यूठान : प्यूठानको सवैभन्दा व्यस्त सडकको रुपमा रहेको बाग्दुला–मच्छि–ठूलावेशी सडक खण्डको बाग्दुलादेखि मच्छि खण्ड कालोपत्रे गर्ने योजनाले मूर्तरुप लिएको छ । तहसनहस सडकका कारण दैनिक कष्टपूर्ण यात्रा गर्न बाध्य यस क्षेत्रका नागरिकहरु सडक कालोपत्रे हुने खवरले उत्साहित छन् । वर्षौदेखि बाग्दुला–भिमगिठे सडक योजना बन्ला र सहज यात्रा गरौँला भनेर कुरीरहेका नागरिकहरु उक्त योजना ‘आकाशको फल आखातरी मर’ जस्तै भएपछि निराश थिए । तर, पछिल्ला केही वर्षदेखि यस सडक खण्डमा धमाधम बजेट विनियोजन भएर काम हुन थालेपछि एकाएक नागरिकहरुको गुमेको आशा फर्किएको छ ।
अहिले बाग्दुलादेखि झिमरुक गाउँपालिका र प्यूठान नगरपालिकाको सिमाक्षेत्र बतासेडाँडासम्म सडक डिभिजन कार्यालय प्यूठानले सडक निर्माण गरिरहेको छ । बतासेडाँडादेखि जिमुरखोलासम्म झिमरुक गाउँपालिकाले सडक फराकिलो बनाउने काम अघिल्लो वर्षदेखि गरिरहेको छ ।
एउटै सडकमा संघीय सरकार अन्तर्गत सडक डिभिजन, प्रदेश सरकार अन्तर्गत सडक पूर्वाधार विकास कार्यालय, झिमरुक गाउँपालिका, प्यूठान नगरपालिका र गौमुखी गाउँपालिकाले बजेट विनियोजन गर्न थालेपछि अन्यौलता छायो ।
कार्यसम्पादन गर्ने निकाय अलमलमा परेपछि सवै सरोकारवाला पक्षबीच झिमरुक गाउँपालिका प्यूठानले गाउँपालिकाको कार्यालयमै प्रमुख जिल्ला अधिकारीको उपस्थितीमा संयूक्त छलफल गरेपछि अहिले आ–आफ्नो ‘साइट क्लिीयर’ भएको छ । आफूले निर्माण गर्ने सडकको क्षेत्र तोकिएपछि सवै कार्यालयले कामलाई तिव्र रुपमा अगाडी बढाएका छन् ।
यही सडक खण्डमा कालोपत्रे सहितको निर्माण गर्नका लागि भौतिक पूर्वाधार विकास मन्त्रालय लुम्विनी प्रदेसले संघीय सरकारको साझेदारीमा समेत प्रदेश समपुरक योजनामा बजेट विनियोजन गरेको छ । चालु आर्थिक वर्षदेखि कार्यान्वयन हुने यो योजनामा ३० करोड बजेट सुनिश्चित भएको छ । प्रदेसले १५ र संघीय सरकारले १५ करोड बजेटको सुनिश्चित गरेका छन् । प्यूठानका संघीय सांसद् सूर्य थापा र लुम्विनी प्रदेसका खानेपानी तथा सहरी विकास मन्त्री सरोज थापा (रोज रााणा) को विशेष जोडबलमा यो योजना प्राथमिकतामा परेको हो ।
यही ३० करोड बजेट विनियोजनको सन्दर्भलाई जोडेर समेत नेपाली कांग्रेस र नेकपा एमाले प्यूठानका नेता, कार्यकर्ताहरु बजेट कसले पा¥यो भनेर होडबाजी लिन तछाडमछाड गरेका थिए । प्यूठानका दुवै नेता थापाद्धय प्रदेसदेखि संघ सरकारसम्म पहुँच नभएको भए अहिले पनि यो सडकको बेहाल ज्यूँका त्यूँ हुने नागरिकहरु बताउँछन् ।
बाग्दुला भिमगिठे योजनाको अन्यौलता र शुरुवाती चरणमा संघ र प्रदेश सरकारले बजेट विनियोजनमा चासो नदेखाएपछि आफ्नै बजेटबाट भएपनि सडक कालोपत्रे गर्ने लक्ष्य सहित झिमरुक गाउँपालिका अगाडी बढेको थियो । सोही अनुसार बतासेडाँडादेखि मच्छि तिर गाउँपालिकाले काम पनि गरिरहेको छ । तर, कालोपत्रे गर्न मोटो बजेट आवश्यक पर्ने भएपछि गाउँपालिकाले त्यसलाई थेग्ने स्थिती थिएन । नागरिकको पीडा देख्न नसकेर गाउँपालिकाले आफ्नो स्रोतबाट बाटो कालोपत्रे गर्ने अभियान थालेकोप्रति नागरिकहरुले स्यावासी दिएका छन् ।
गाउँपालिका अध्यक्ष पित बहादुर महतरा क्षेत्री र उपाध्यक्ष प्रमोद पोख्रेल आफ्नो पालिका क्षेत्रमा पर्ने बाटोलाई जसरी पनि कालोपत्रे गर्ने अभियानमा दृढताका साथ लागिरहेका छन् । केन्द्र र प्रदेस सरकारमा भएका आफू निकटका नेता, मन्त्रीहरुलाई बजेट पारिदिन उनीहरु हारगुहार गरिरहे । फलस्वरुप बजेटले सम्वोधन गरेको छ तर कार्यसम्पादन चुस्तदुरुस्त हुनुपर्नेमा नागरिकहरुले सुझाव दिएका छन् । तर, अहिले विनियोजिन बजेट पर्याप्त नभएको सम्वन्धित कार्यालयहरुले प्रतिक्रिया दिएका छन् ।
दशकौँदेखिको अन्यौलता हटेको छ, बाटो कालोपत्रे हुनेछ : एमसी
झिमरुक गाउँपालिका अध्यक्ष पित बहादुर महतरा क्षेत्रीले दशकौँदेखिको अन्यौलमा रुमलिएको बाग्दुला मच्छि सडक अव केही वर्षभित्र कालोपत्रे हुने ठोकुवा गरे । गाउँपालिका, सडक पूर्वाधार विकास कार्यालय र सडक डिभिजन प्यूठानले यो सडक कालोपत्रे गर्ने काम गर्ने उनले बताए ।
सोही अनुसार मंगलवार सडक पूर्वाधार विकास कार्यालय प्यूठानले गर्ने जिमुरखोलादेखि मच्छि खण्डको एक मिलोमिटर ३ सय मिटर क्षेत्रको सडकको नापजाँच गर्ने काम सम्पन्न भएको छ । गाउँपालिका अध्यक्ष एमसी, उपाध्यक्ष प्रमोद पोख्रेल र सडक पूर्वाधार कार्यालय प्यूठानका प्रमुख बरिष्ठ इन्जिनियर चन्द्र बहादुर शाहको उपस्थितीमा प्राविधिक सहितको टोलीले सडकको नाँपचाज गरेका छन् ।
यो खण्डमा प्रदेश सरकारले बहुवर्षिय योजना अन्तर्गत ५ करोड बजेट चालु आवमा विनियोजन भएको छ । तर, हाडीगैरादेखि बतोडाँडासम्मको काम प्रदेस समपुरक योजना अन्तर्गत हुनेछ । त्यसको नापँजाच गर्न बाँकी रहेको बरिष्ठ इन्जिनियर शाहले जानकारी दिए । मच्छिदेखि ढाडसम्मको काम सडक डिभिजन प्यूठानले गरिरहेको छ ।
अध्यक्ष एमसीले आर्थिक वर्ष २०८१÷०८२ देखि झिमरुक गाउँपालिकाको पहलमा पाँच करोड बजेटमा बतासेडाडा–जिमुरखोला खण्डको साढे तीन किलोमिटर सडकको स्तरोन्नतिको काम चलिहरेको छ । यो सडकलाई जसरी पनि कालोपत्रे गर्ने अभियानमा सवैले साथ दिन गाउँपालिका अध्यक्ष एमसीले आग्रह गरेका छन् ।
