बाग्दुला–दम्ती कालोपत्रे सडक निर्माणमा ढिलासुस्ती

पोष्ट

गृहपृष्ठ
पोष्ट
बाग्दुला–दम्ती कालोपत्रे सडक निर्माणमा ढिलासुस्ती

बाग्दुला–दम्ती कालोपत्रे सडक निर्माणमा ढिलासुस्ती

मंगलबार, चैत ७, २०७९ प्यार अलि खाँन

बाग्दुला (प्यूठान) : प्यूठानको प्रमुख व्यापारिक केन्द्र बाग्दुला बजारदेखि दम्तीसम्म हुन थालेको कालोपत्रेको काममा ढिलासुस्ती भएको छ । चालु आर्थिक वर्षको असार मसान्तसम्म पुरा हुनुपर्ने योजनाको काममा ढिलासुस्ती भएको प्यूठान नगरपालिका वडा नं ८ का वडा अध्यक्ष पदम बहादुर थापाले बताए ।

बाग्दुला देखि दम्तीसम्म ३ किलोमिटर ३ सय मिटर पक्की गर्ने कामको जिम्मा हाम्रो निर्माण सेवा सुर्खेतले पाएको छ । ‘५ करोड ४१ लाख रुपैयाँमा कालोपत्रे र नालीको काम गर्ने गरि सम्झौता भएको छ’,सडक पूर्वाधार कार्यालय प्यूठानका कार्यालय प्रमुख चन्द्र शाहले भने, ‘काममा ढिलासुस्ती भएको छ । हामीले बारम्बार ताकेता गर्दै आएका छौं ।’ असार मसान्त सम्ममा काम सम्पन्न गर्ने सम्झौता भएको उनले जानकारी गराए ।

निर्माण कम्पनीका प्रतिनिधि कृष्ण प्रसाद ओलीले तोकिएकै समयमा काम सम्पन्न गर्ने बताएपनि कार्यसम्पादनको ढिलासुस्तीले त्यो पुष्टि गर्दैन् । बाग्दुला बजार क्षेत्र देखि खप्रेङखोला आसपासका ठाउँहरुमा वाल उठाउने, नाली बनाउने काम भइरहेको उनले बताएका छन् । सडक क्षेत्रमा पर्ने विद्युत्तिय पोल व्यवस्थापनबारे नेपाल विद्युत प्राधिकरणसंग आवश्यक छलफल तथा समन्वय पछि कामले गति लिने उनको दाबी छ ।जनशक्ति बढाएर कामलाई तिव्रता दिने उनले बताए ।

बर्खायाम शुरुहुँदै गर्दा सडक स्तरोन्नतीको कामले गति नलिँदा बाग्दुला बजार क्षेत्रका स्थानीय व्यवसायी र बाग्दुला बाहाने ओहोरदोहोर गर्ने यात्रुहरु चिन्तित हुन थालेका छन् । सामान्य वर्षा हुँदा समेत बाग्दुलाको सडक हिलाम्मे हुने गरेको छ । बजार क्षेत्रको सडकमा ड्रेन (नाली) बुझिदा सडकमै पानीको भल बग्ने र हिलो हुने हुँदा बजारमा किनमेल गर्न आउने सर्वसाधारण देखि व्यापारीहरूले सास्ती खेपीरहेका छन् । समस्या समाधानमा प्यूठान नगरपालिका मौन छ ।

प्रकाशित मिति: मंगलबार, चैत ७, २०७९ ०८:३५