बुटवल : प्रतिनिधी तथा प्रदेशसभा सदस्यमा सर्वसम्मत उमेदवार सिफारिस भएका जिल्ला र निर्वाचन क्षेत्रमा चुनावी उमंग छाएको छ । नेकपा एमालेका सम्वन्धित जिल्ला कमिटीले केही निर्वाचन क्षेत्रमा सर्वसम्मत उमेदवार सिफारिस गरेको छ ।
पार्टी केन्द्रिय कमिटीले उमेदवारको अन्तिम टुंगो लगाउन बाँकी रहेपनि सिफारिस भएका पात्रहरु नै उमेदवारको रुपमा आउने मतदातासम्म सन्देश पुगेको छ । नेता, कार्यकर्ताहरुले उमेदवारहरुसँगको तस्विर राखेर चुनावी प्रचार प्रसार समेत गरिरहेका छन् ।
‘जिल्लाबाट उमेदवारहरु सर्वसम्मत सिफारिस भएपछि कार्यकर्ता तहमा उत्साह जागेको छ’, नेकपा एमाले झिमरुक गाउँपालिका संगठन कमिटीका अध्यक्ष इन्द्रमणी पोखरेलले भने,‘मतदाता तहमा लैजाने कार्यक्रमहरुको बारेमा खाका बनाउँदैछौ । हामी सवै बस्तीमा पुगेर मतदातासँग चुनावी कार्यक्रम गर्छौ ।’
प्यूठानबाट प्रत्यक्षतर्फ प्रतिनिधीसभा सदस्यमा पार्टीका पोलिटब्यूरो सदस्य एवं प्यूठान इन्चार्ज सूर्य थापा सर्वसम्मत सिफारिस भएका छन् । प्रदेशसभा सदस्यमा पार्टीका निवर्तमान जिल्ला अध्यक्ष एवं प्रदेश कमिटी सदस्य तुल्सीराम शर्मा निर्वाचन क्षेत्र नम्वर १ मा र निर्वाचन क्षेत्र नम्वर २ मा केन्द्रिय सदस्य एवं प्यूठान सह इन्चार्ज हरि प्रसाद रिजाल सिफारिस भएका छन् । यी तीनै जनाको नाम नै अन्तिम उमेदवारको रुपमा निर्णय हुने बुझिएको छ ।
राष्ट्रिय जनमोर्चाले पनि सिफारिस गरेर पठाएको नामावली अनुसार केन्द्रीय कमिटीले पार्टीका उपाध्यक्ष दुर्गा पौडेललाई उमेदवार बनाउने निर्णय गरेको छ । तर, गठवन्धनभित्र कसले टिकट पाउने भन्ने अन्यौलले चुनावी कार्यक्रम बनेका छैनन् । एमाले रुपन्देहीले पाँच निर्वाचन क्षेत्रमध्ये चार वटा क्षेत्रमा प्रत्यक्षतर्फ उमेदवार सर्वसम्मत निर्णय गरेर सिफारिस पठाएको जिल्ला कमिटी अध्यक्ष तेजेन्द्र केसीले जानकारी दिए । सिफारिस भएका क्षेत्रमा स्थानीय मतदाताहरुमा उमंग छाएको उनले सुनाए । ‘अहिले आन्तरिक रुपमा भेला, भेटघाट र कार्यकर्ताहरुको गुनासा सुन्ने काम भइरहेको छ’,केसीले भने,‘केन्द्रले अन्तिम टुंगो लगाएपछि ठूला कार्यक्रमहरु तय हुन्छन् ।’
पाँच निर्वाचन क्षेत्रमध्ये निर्वाचन क्षेत्र नम्वर २ लाई रुपन्देहीमा विशेष चासोका साथ लिने गरिन्छ । पूर्व अर्थमन्त्री एवं एमालेका उपाध्यक्ष विष्णु पौडेलको निर्वाचन क्षेत्र भएकाले पनि यहाँ सवैको चासो हुने गरेको छ । पौडेलले यस क्षेत्रबाट निरन्तर तीन पटक चुनाव जितेर ‘ह्याटिक’ गरेका छन् । उनको यो चौथो प्रयास हो ।
प्रतिनिधीसभा सदस्य तर्फ लुम्विनी प्रदेशका २६ निर्वाचन क्षेत्रमध्ये १२ वटा क्षेत्रमा सर्वसम्मत उमेदवार सिफारिस भएको नेकपा एमाले लुम्विनी प्रदेश कमिटीका अध्यक्ष राधाकृष्ण कँडेलले जानकारी दिए । पार्टीका महासचिव शंकर पोखरेलको निर्वाचन क्षेत्र दाङ २ हो । पोखरेलसँग माओवादीबाट पूर्व सभामुख कृष्ण बहादुर महरा प्रतिस्पर्धी हुने देखिएको छ ।
उपमहासचिव प्रदिप ज्ञवाली गुल्मी १ र एक मात्र निर्वाचन क्षेत्र रहेको अर्घाखाँचीबाट पार्टीका सचिव टोप बहादुर सायमाझी चुनाव लड्दै छन् । पार्टीका सचिव छविलाल विश्वकर्मा रुपन्देही १ बाट चुनाव लड्ने गरी पार्टीले सर्वसम्मत निर्णय गरेको छ । पोलिटब्यूरो सदस्य ठाकुर गैरे पाल्पा २ र खिमलाल भट्टराई रुपन्देही ५ बाट चुनाव लड्ने करिव निश्च्ति छ । कपिलबस्तु २ मा बृजेशकुमार गुप्ता, कपिलबस्तु ३ मा मंगलप्रसाद गुप्ता, रुपन्देही ४ मा कृष्णप्रसाद भूसाल र एउटा मात्र क्षेत्र रहेको रोल्पामा पूर्ण बुढा मगर चुनाव लड्दै छन् ।
.jpg)
