प्यूठान : गाउँमै माध्यमिक तहसम्मको पढाई नहुँदा विद्यार्थीलाई समस्या भएको भन्दै झिमरुक गाउँपालिका ५ प्यूठान स्थित नेपाल राष्ट्रिय आधारभूत विद्यालय हिरापोखरीका अभिभावक मावी तह सम्मको पढाई संचालनका लागि कस्सिएका छन् । माबी चलाउने अभियानमा अभिभावकहरुलाई सवैभन्दा ठूलो भरोसा सहयोगी मनहरुको छ । ०३२ सालमा स्थापना भएको यस विद्यालयमा हाल कक्षा ८ सम्मको मात्र पढाई भइरहेको छ ।
आगामी शैशिक शत्रदेखि मावी तह (कक्षा ९–१०) संचालन गर्ने लक्ष्यका साथ विद्यालयले सहयोग संकलन अभियान थालेको छ । सहयोगका लागि विद्यालय र अभिभावकहरुले सार्वजनिक रुपमा सहयोगको अपिल गरेका छन् । कक्षा ८ देखि माथिल्लो तहको पढाईका लागि विद्यार्थीहरु बालशिक्षा माध्यमिक विद्यालय मच्छि र बलभद्र मावी बादीकोट पुग्नुपर्ने बाध्यता छ । कम्तीमा दुई घण्टा पैदल हिडेर विद्यार्थीहरु मच्छि जाने र बसमा चढेर आउँदा÷जाँदा दुई सय रुपैयाँ भाडा दैनिक रुपमा लाग्ने गरेको विद्यार्थीहरु गुनासो गर्छन् ।
‘हाम्रा छोराछोरीले टाढा पढ्न जाँदा दुःख पाए, यही मावी चलाउँ भनेर अभिभावकहरुले माग राख्नुभयो’,प्रधानाध्यापक यशोदा खड्काले भनिन्,‘अभिभावकहरुको माग र साथले नै हामी कक्षा बढाउने तयारी थालेका छौँ । सबैको सहयोग चाहिएको छ ।’
उनले मावी संचालनका लागि पूर्वाधार निर्माण र शिक्षक व्यवस्थापनका लागि कम्तीमा ५० लाख रुपैयाँ बजेट आवश्यक पर्नेे जानकारी गराइन् । १० कक्षासम्मको पढाई संचालन गर्न कार्यालय, पुस्तकालय, विज्ञान प्रयोगशाला, कम्यूटर कक्षा, बालविकास सहित गरी कम्तीमा १५ वटा कोठा आवश्यक पर्छ । हाल विद्यालयमा ६ वटा कक्षा कोठा चालु अवस्थामा छन् । ५ कोठे नयाँ भवन निर्माणधिन छ । नयाँ भवन पुरा भइसकेपछि पनि चारवटा कोठा अपुग हुने खड्काले जानकारी गराइन् ओखरकोट क्षेत्रमा रहेका बस्ती सिस्नेखोला, बादीखोला, आप्रेखोला, खोरपानी, रातामाटा, ठूलापोखरा, सोरपोखरा, टापुटोल लगायका बालवालिका यहाँ पढ्न आउने गर्दछन् ।
छात्रा १ सय १६ र छात्र १ सय ४२ गरी कुल २ सय ५८ जना विद्यार्थी अध्ययनरत छन् । बालविकास सहित १० जना शिक्षकहरु कार्यरत छन् । कक्षा ८ मा ३० जना विद्यार्थी अध्ययनरत रहेको प्रधानाध्यापक खड्काले जानकारी दिइन् ।
मावी तहसम्मको पढाई संचालनका लागि समुदायस्तरबाट सहयोग संकलन अभियान शुरु गरिएको आर्थिक तथा अक्षयकोष व्यवस्थापन समितिका संयोजक प्रदिप जिसीले जानकारी गराए । ‘पूर्व विद्यार्थी, शिक्षक र सहयोगी मनहरुलाई सार्वजनिक रुपमा सहयोगको आव्हान गरेका छौँ’,पूर्व विद्यार्थी समेत रहेका जिसीले भने,‘सवैतिरबाट सहयोगको आश्वासन पाएका छौँ । नयाँ शैक्षिक शत्रमा जसरी पनि मावी चलाउँछौ ।’
.jpg)
.jpg)
