पाल्पा : नेपाली कांग्रेसको आगामी १५औँ महाधिवेशन प्रतिनिधिका लागि पाल्पा–१ नम्बर क्षेत्रबाट युवा (खुला–३५ वर्षमुनि) तर्फ ऋषिराम भट्टराईले आफ्नो उम्मेदवारी घोषणा गरेका छन् ।
समाजशास्त्रमा स्नातकोत्तर तहको अध्ययन पुरा गरेका भट्टराई विभिन्न सामाजिक सेवाका क्षेत्रमा समेत क्रियाशिल छन् । युवाको आवाजलाई पार्टीको निर्णय प्रक्रियामा अझ प्रभावकारी रूपमा स्थापित गर्ने उद्देश्यसहित आफूले उम्मेदवारी घोषणा गरेको भट्टराई बताउछन् ।
भट्टराईले पार्टीभित्र एकता, समावेशिता, उत्तरदायित्व र संगठन सुदृढीकरणलाई प्राथमिकतामा राख्दै सबल कांग्रेस निर्माणका लागि आफ्नो यात्रा अघि बढाउने प्रतिबद्धता व्यक्त गरेका छन् ।
उम्मेदवारी घोषणा गर्दै उनले आफूलाई माया, विश्वास, सुझाव, सद्भाव र सहयोग गर्दै आएका पार्टीका अग्रज, साथी, शुभेच्छुक तथा युवा प्रतिनिधिहरूप्रति आभार व्यक्त गरेका छन्। साथै, आगामी महाधिवेशनमा आफ्नो उम्मेदवारीलाई समर्थन गर्दै अमूल्य मत प्रदान गर्न उनले आग्रह गरेका छन्।
“युवाको आवाजलाई पार्टीको निर्णय प्रक्रियामा अझ प्रभावकारी रूपमा स्थापित गर्दै एकता, समावेशिता र उत्तरदायित्वसहित सबल कांग्रेस निर्माणका लागि मेरो यात्रा अघि बढाउने प्रतिबद्धता व्यक्त गर्दछु,” भट्टराईले भने । उनले आफ्नो उम्मेदवारीलाई युवाको सहभागीता, नेतृत्व विकास र संगठन निर्माणसँग जोडेर अघि बढाउने बताएका छन् ।
