प्यूठान : जिल्ला अस्पताल विजुवार प्यूठानमा बालबच्चाका बिरामीहरू बढ्न थालेका छन् । बालरोग विशेषज्ञ डाक्टर आएसंगै बालबालिकाहरुको उपचार गर्न ल्याउनेको संख्यामा बृद्धि हुँदै गएको अस्पताल प्रशासनले जनाएको छ ।
दुई वर्ष अघिदेखि अस्पतालमा पहिलोपटक बालरोग विशेषज्ञ डाक्टर सौरभ श्रेष्ठको आगमनसंगै अस्पतालमा बिरामी किशोर किशोरी, बालबालिकाहरुले सहज उपचार सेवा लिन पाएका छन् । अहिले दैनिक औषतमा ३० देखि ३५ जना र अधिकतम ५० जना बालबच्चाको चेकजाँच हुँने गरेको डाक्टर सौरभ श्रेष्ठले बताए ।
‘कुनै महिनामा झण्डै ७ सय जनासम्म बिरामीहरू पनि हेरियो’, डाक्टर सौरभले भने, ‘अस्पतालमै उपचारका लागि ओपिडी तथा भर्नातर्फ हामीले सक्दो प्रयास गर्दै आएका छौं ।’ यसअघि प्यूठान अस्पतालमा विशेषज्ञ डाक्टर नहुँदा बालबालिकाहरुको सहज उपचार सेवामा कठिनाई हुने गरेको थियो ।
चिसो मौसम बढेसंगै निमोनिया, श्वास्प्रश्वास, रुघाँखोकी सम्बन्धी बिरामी बच्चाहरु आउने गरेको अस्पतालले जनाएको छ । नवजात शिशुको मृत्युदरमा समेत कमी भएको अस्पतालले जनाएको छ । ‘बच्चाको उपचार संवेदनशील हुने गर्दछ’,‘एमडीजीपी डाक्टर सन्तोष केसीले भने, ‘बच्चाकै डाक्टर यहाँ हुँदा उपचारमा सहजता थपिएको छ ।’ बितेको चार महिनादेखि नवजात शिशु मृत्युदर शून्य भएको उनको भनाई छ ।
‘शल्यक्रिया वा सामान्यतया डेलिभरी गराउँदा बच्चाको डाक्टर साथमा नहुँदा चुनौती बढ्ने गरेको थियो’,केसीले भने, ‘अहिले हामी ढुक्कसंग शल्यक्रिया गर्दै आएका छौं ।’ जिल्ला अस्पतालमा अहिलेसम्म भेन्टिलेटर, आइसियू, एनआइसियू, पिआइसियू सेवा भने सूचार हुनसकेको छैन् । एनआइसियू सेवा मात्रै भएको भए बालबालिकाको रिफर संख्यामा धेरै कमी हुने डा.शौरभको भनाई छ ।
अस्पातलमा बच्चाको राम्रो डाक्टर आएको खबर सुनेरै आफ्नो ११ वर्ष छोरालाई उपचार गराउन अस्पताल आएको गौमुखी गाउँपालिका –७ नारीकोटकी कल्पना जिसीले बताईन् । बच्चाहरुको राम्रो उपचार भएकै कारण अस्पतालमा पटकपटक आउने गरेको प्यूठान नगरपालिका –७ पुण्यखोलाकी खिमा केसी सुनाउँछिन् । ‘पहिला पहिला बच्चा बिरामी हुने बित्तिकै बुटवल जान पर्दथ्यो, अहिले पर्दैन ।’ उनले भनिन् । डाक्टर सौरभ बिदामा बस्न मिल्ने हुँदाहुँदै पनि अस्पतालमा आएका बिरामी बच्चाहरु हेर्ने गरेको बताए । करार सेवामा कार्यरत डाक्टरको सेवा अवधि एक महिनापछि पुरा हुँदैछ ।
.jpg)
.jpg)
