बुटवल : झिमरुक गाउँपालिका–४ बौडा प्यूठानका ज्ञान बहादुर केसीले बुटवलमा कार्बन क्लिनिङ वर्कसप संचालनमा ल्याएका छन् । नौलो व्यवसायको रुपमा उनले बुटवल उपमहानगरपालिका–९, फाइनान्सचोकमा स्वर्गद्वारी कार्बन क्लिनिङ वर्कसपको सुभारम्भ गरेका हुन् । ३३ वर्षिय केसीले संचालन गरेको उक्त क्लिनिङको उनकी सात वर्षिय छोरी आकांक्षा केसीले उद्घाटन गरिन् ।
सवारीसाधनहरु प्रयोग गर्नेहरुको संख्या दिनप्रतिदिन बढ्दै गएपनि सानो कुरामा ख्याल नगर्दा लाखौँ, करोडौँका साधनहरु विग्रने समस्यालाई मध्यनजर गर्दै पहिलोपटक क्लिनिङ वर्कसप संचालन गरिएको केसीको भनाई छ । ‘पश्चिम नेपालका धेरै ठाउँमा यस्तो खालको क्लिनिङ खुलेका छैनन्’,केसीले भने,‘बुटवलमा यो निकै फरक खालको व्यवसाय हो ।’
मोटरसाइकल, कार, जीप लगायतका गाडीहरुको यहाँ क्लिनिङ गर्ने गरिन्छ । गाडीको क्लिनिङ गरिसकेपछि तेल कम खाने, पिकअप बढ्ने, सफा गरिसकेपछी नयाँ गाडिको जस्तै ईन्जिनको महशुस हुने, आरपिएम घटवट भएको ठिक हुने, गाडीको ‘स्टाटिङ’ राम्रो हुने, भाइब्रेसन कम गर्ने फाइदा रहेको व्यवसायी केसीले जानकारी दिए ।
त्यस्तै, इन्जिनको पाट्सलाई सुरक्षित गराई त्यसको आयु बढाउने, गाडीबाट निस्केर मानव स्वास्थ्यलाई प्रतिकुल असर गर्ने ग्यास कम फाल्ने र वातावरणलाई स्वच्छ राख्ने, कालो धुवा फाल्न कम हुने र एक पटक सफा गरिसकेपछि कम्तीमा दश हजार किलोमिटरसम्म सफा गर्न नपर्ने लगायतका बहुउपयोगी फाइदा यसमा रहेको केसीले सुनाए । उक्त व्यवसाय संचालनका लागि करिव १० लाख रुपैयाँ लगानी भएको उनले बताए ।
केसी विगत १२ वर्षसम्म प्यूठानस्थित मल्लरानी ग्रामीण विकास सरोकार केन्द्र लगायत गैर सरकारी संस्थामा कार्यरत थिए ।
