बुटवल : कात्तिक २ गतेदेखि लागुहुने गरी सरकारले अवदेखि कोरोना लागेका व्यक्तिहरुको खर्च सरकारले नगर्ने निर्णय गरेको छ । स्वास्थ्य तथा जनसंख्या मन्त्रालयले आइतवार गरेको कोरोना प्रेस ब्रिफिङमा उक्त जानकारी गराइएको हो । सम्वन्धित व्यक्तिले आफ्नै खर्चमा उपचार गराउन सरकारले आग्रह गरेको छ ।
स्वास्थ्य मन्त्रालयका प्रवक्ता डा. जागेश्वर गौतमले आर्थिक रुपमा विपन्न, अशक्त तथा असहाय अवस्थामा रहेका नागरिक, असहाय एकल महिला, अति अपाङ्गता भएका नागरिक, जेष्ठ नागरिक, अग्रपंतिमा खटिने स्वास्थ्यकर्मी, सरसफाई कर्मचारी, सुरक्षाकर्मीको मात्रै सरकारले परीक्षण र उपचार गर्ने बताएका छन् । तोकिएका ती व्यक्तिहरुमा पनि लक्षण भएमा मात्र परीक्षण र उपचार निःशुल्क गरिने प्रवक्ता गौतमले जानकारी गराए ।
बीमा कम्पनीहरुबाट कोरोना बीमा गरेको भएमा परीक्षण र उपचार बीमा रकमबाटै लिइने पनि उनले बताए । २०७७ असोज १९ गतेको मन्त्रिपरिषद्को निर्णय बमोजिम यस्तो व्यवस्था गरिएको मन्त्रालयले जनाएको छ । उक्त निर्णय सबै किसिमका सरकारी, गैरसरकारी तथा निजी अस्पतालहरुमा लागू हुने छ । सरकारको उक्त निर्णय सार्वजनिक भएसँगै सामाजिक सञ्जालभरी विरोध शुरु भएको छ ।
.jpg)