बुटवल : लुम्बिनी प्रदेशका ७० हजार ५ सय १८ जना बालवालिकाहरुलाई १५ महिनाभित्र पाउनुपर्ने सबै खोप प्राप्त भएपछि सिंगो प्रदेशलाई नै पूर्ण खोप सुनिश्चित र दिगोपना घोषणा गरिएको छ । विहिवार एक कार्यक्रमको आयोजना गरी घोषणा गरिएको हो । आर्थिक वर्ष २०८१÷८२ मा घरधुरी सर्वेक्षणमार्फत १६ देखि २३ महिनासम्मका बालवालिकाहरुले पाउनुपर्ने सवै खोप पाएका छन् । शून्य डोज भएका ६९ र खोप छुट भएका २ हजार ३ सय ८७ बालबालिकाको पहिचान गरेर खोप लगाइएको थियो ।
जिल्लागत विवरणअनुसार सबैभन्दा धेरै खोप लगाउनबाट छुटेका बाँकेमा ७ सय ६२, कपिलवस्तुमा ६ सय ५२ र रुपन्देहीमा ४ सय ४४ थिए । पूर्वी रुकुममा खोप लगाउनबाट कुनै पनि बालवालिका छुटेका थिएनन् ।
पूर्ण खोप अभियान अन्तर्गत २०८२ जेठ ८ मा नवलपरासी पश्चिमबाट दिगोपना घोषणा सुरु भएको थियो । लगत्तै रोल्पा, पाल्पा, कपिलवस्तु, बाँके, रुपन्देही, प्यूठान, रुकुमपूर्व, दाङ, गुल्मी, बर्दिया र अन्तिममा २०८२ असार २७ गते अर्घाखाँचीलाई घोषणा गरिएको थियो । प्रदेशका १२ वटै जिल्लामा पूर्ण खोप पुगेपछि राष्ट्रिय खोप समन्वय समितिले प्रमाणित गरी प्रदेशलाई नै पूर्ण खोप सुनिश्चित प्रदेश घोषणा गर्ने अनुमति दिएको हो ।
लुम्बिनी प्रदेशका मुख्यमन्त्री चेतनारायण आचार्यले भविष्यमा कुनैपनि बालबालिका खोप लगाउने सुविधाबाट बञ्चित नहुनेमा विश्वास व्यक्त गरे । घोषणा सभालाई सम्बोधन गर्दै आचार्यले कुनै पनि बालबालिका खोप सेवा लिनबाट बञ्चित हुन नपरोस् भन्नेगरी अभियान केन्द्रीत गरिनुपर्ने बताए ।
‘प्रदेश सरकारले लिएको लक्ष्य प्राप्तिका लागि जुन प्रतिबद्धताका साथ तपाईंहरू लाग्नुभयो, सबै बधाईका पात्र हुनुहुन्छ । हामीले प्रतिबद्धता पत्रमा हस्ताक्षर गरिसकेका छौं’,उनले भने,‘आगामी दिनमा पनि कुनै बालबालिका खोप सेवाबाट वञ्चित नहोस् भन्ने उद्देश्यका साथ यहाँहरु निरन्तर लागिपर्नुहुनेछ भन्ने विश्वास लिएको छु ।’
प्रदेशका स्वास्थ्यमन्त्री खेम बहादुर सारुले २०७९ भाद्र ३१ गते नेपालकै दोश्रो पुर्णखोप प्रदेश पहिलो पटक घोषणा भएको र त्यसपश्चात निरन्तर प्रत्येक वर्ष सुनिश्चितता तथा दिगोपना गर्दै आएको बताए । मातृमृत्यूदर, शिशुमृत्यूदर र पोषणलाई स्वास्थ्य मन्त्रालयले विशेष प्राथमिकता दिएर काम गरिरहेको उल्लेख गर्दै उनले स्वास्थ्यका नकारात्मक सुचकहरुलाई न्यूनिकरण गर्ने विषयमा प्रदेस सरकारले प्रगती हासिल गरेको दावी गरे ।
