झिमरुक (प्यूठान) : मच्छि–बांगेफेदी–पुर्कोटदह सडक खण्डमा पर्ने झिमरुक ४ स्थित न्याउरेखोला बढ्दै गएपछि स्थानीयले सास्ती पाएका छन् । वर्षेनी बर्खामा स्थानीय ठाडो खोलाले सताउने गरेको छ । दिनहुँ परिरहेको पानीले खोलाको बहाव बढ्दै गएको झिमरुक ४ बांगेमरोठका यातायात व्यवसायी नारायण रानाले बताए । ‘तीन जिल्ला ओहोरदोहोर गर्ने बाटो हो’,उनले भने,‘पुल नबन्दासम्म वर्षेनी यस्तै दुःख हुन्छ ।’
मदन भण्डारी राजमार्ग समेत यसै सडक हुँदै निर्माण गर्नका लागि विस्तृत अध्ययन प्रतिवेदन (डिपिआर) भइरहेको छ । गुल्मीको मदाने गाउँपालिकाको पुर्कोट दह, अर्घाखाँचीको मालारानी गाउँपालिका हुँदै सन्धिखर्क र सौतामारेका स्थानीय यसै सडक भएर आहोरदोहोर गर्छन् । सधैँको वर्खामा खोलाले सताउँदै आएपनि यसको समाधानका लागि सम्वन्धित निकायले चासो नदेखाएको यस क्षेत्रका स्थानीयले गुनासो गरेका छन् ।
गाउँपालिका कार्यालय भ्यागुते, विजुवार, बाग्दुला, खलंगा र बजार गर्नका लागि मच्छि आवतजावत गर्नेहरु बढी प्रभावित भएका छन् । न्याउरेखोला–बांगे–बौँडाहुँदै अर्घाखाँचीको गोखुंगा जोड्ने बाटो पनि उक्त खोलाले अवरुद्ध पारेको छ । बांगे, बौडाहुँदै अर्घाखाँची पुग्ने सर्वसाधरणले सडक अवरुद्ध भएपछि सास्ती पाएका छन् ।
हेर्नुहोस् भिडियो :
.jpg)
