प्यूठान : प्यूठान नगरपालिकाले नगर क्षेत्रका विपन्न वर्गलाई वितरण गर्ने भनेर आएका विद्युत्तीय इन्डक्सन चुल्होमा हुनेखानेको रजाइँ भएको छ । महिनौसम्म कार्यालयमै थन्काएर राखेका ती चुल्होलाई नगरपालिकाले कार्यक्रम परिमार्जन गरेर वितरण गरेपछि चौतर्फी विरोध भएको छ ।
चुल्हो पाउनेमा श्रीमतीको नाम राखेर नगरपालिकाका संस्थापक मेयर अर्जुन कुमार कक्षपती, नेकपा एमाले प्यूठान नगरपालिकाका नगर कमिटी अध्यक्ष टंक बहादुर खड्का, डाक्टर आनन्द कुमार श्रेष्ठ, पूर्व वडा अध्यक्ष लक्ष्मीप्रकाशराज भण्डारी लगाएत छन् । स्थापित व्यवसायी, सामाजिक क्षेत्रका व्यक्ति लगाएतले पनि चुल्हो लगेका छन् ।
नगरपालिका र वैकल्पिक ऊर्जा प्रवद्र्धन केन्द्रको साझेदारीमा १ हजार ४ सय थान विद्युत्तीय चुल्हो नगरपालिकाले लिएको थियो । बजारमा प्रती चुल्हो ५ हजारदेखि ६ हजारसम्म पर्ने चुल्होमा नगरपालिकाको करिब २० प्रतिशत लगानी रहेको नगरपालिकाका प्रवक्ता एवं वडा नम्वर ३ का वडा अध्यक्ष सुमनराज श्रेष्ठले जानकारी दिए ।
विद्युत्तीय चुल्हो वितरण गर्न केहि प्राविधिक जटिलताहरु आएको उनको भनाई छ । विद्युत नपुगेको, विद्युत्त क्षमता नपुगेको, विपन्न समूहले चुल्हो प्रयोग गर्न थप ३÷४ हजार खर्च गर्नुपर्ने अवस्था देखिएकाले कार्यपालिकाको बैठकले कार्यक्रम परिमार्जन गरेर करदाता उपहार कार्यक्रमको रूपमा चुल्हो वितरण श्रेष्ठले जानकारी गराए ।
एमाले प्यूठान नगरपालिका कमिटीले सोमवार प्रेस विज्ञप्ती जारी गर्दै विद्युत्तीय चुल्हो वितरण प्रक्रियाप्रती विरोध जनाएको छ । कार्यवाहक नगर कमिटी अध्यक्ष धुर्व जिसीद्वारा हस्ताक्षरित विज्ञप्तिमा भनिएको छ,‘कार्यक्रमको मर्म विपरीत नगरपालिकाले एकाएक धेरै कर तिर्ने करदातालाई प्रोत्साहन स्वरूप वितरण गरेको कार्य त्रुटिपूर्ण र जनभावना विपरीत छ ।’
नगरपालिकाले संकलन गर्ने राजश्वबाट गरीब विपन्न परिवारलाई सेवा सुविधा प्रदान गर्न लोककल्याणकारी व्यवस्थाको न्यूनतम मान्यता विपरीत भएको एमालेले जनाएको छ । चुल्होको प्रयोगको प्रभावकारिताको सामान्य ख्याल समेत नगरी वितरण गरिनु मापदण्ड त्रुटिपूर्ण रहेको विज्ञप्तीमा भनिएको छ ।
‘जनताले गाँस कटाएर तिरेको करको चरम दुरुपयोग हो । यस्तो निर्णय तत्काल सच्चाई विपन्न तथा गरिव परिवारको हित, राहत पुग्ने खालका र आय आर्जनसंग जोडिने योजनाहरूमा जोड दिन प्यूठान नगरपालिका समक्ष जोडदार अपिल गर्दछौं ।’ विज्ञप्तीमा लेखिएको छ । १ हजार ३ सय चुल्हो नगरपालिकाले वितरण गरेको छ । बाँकी रहेका १ सय चुल्हो नगर क्षेत्रमा वडा कार्यालय, स्वास्थ्य संस्था, विद्यालय र प्रहरी चौकीमा वितरण गर्ने कार्यक्रम रहेको प्रवक्ता सुमनराज श्रेष्ठले सुनाए ।
.jpg)
