‘बा’ हरू आफैमा महान् हुनुहुन्छ, अनेक फुर्का गास्नै पर्दैन्
बुटवल : लामोसमयदेखि आफ्ना व्यंग्यात्मक लेख रचना मार्फत धेरैको मनमा बसेका मधुसुदन पन्थीले कुशे औँसी अर्थात बुवाको मुख हेर्ने दिनलाई पनि व्यंग्य शैलीमै शुभकामना दिए । उनका सटिक र क्षणभरमै मानसपटलमा बसीहाल्ने शब्दले धेरैको मन तानेको छ । उनी आफ्नो लेखनलाई धेरै औपचारिक र गह्रौँ शव्दले भर्दैनन् ।
गाउँघरमा बोलिने ठट्यौली भाषालाई उनले आफ्नो लेखनसिपमा ढाल्छन् । बुवाको मुख हेर्ने दिनलाई पनि उनले यसैगरी प्रस्तुत गरेका छन् । पन्थी नेपाल सरकारका शाखा अधिकृत हुन् । पन्थीले कसरी सम्झे आफ्ना बाहरुलाई हेरौँ उनले कोरेका शव्दहरु :
जन्म र कर्म दिने बा, ‘राम्रोसँग पढ्’ भन्दै कान निमिठ्ने हजुरबा, ‘तैले गरिखाने भइनस्, पढ् है पढ् लन्ठु’ भन्दै गाली गर्ने कान्छा बा अनि यो लन्ठुलाई पत्याएर छोरी नै अघि लगाई दिने ससुरा बा लगायत सबै बाहरुलाई नमन ।
बाहरू आफैमा महान् हुनुहुन्छ, अनेक फुर्का गास्नै पर्दैन किनभने आफुलाई दुई जनाको बा बन्न दाँतबाट पसिना आएका छन् । बा चार जनाको बा बन्नुभयो । हजुरबा सात जनाको । ससुराबा पाँच जनाको, कान्छा बा तीन जनाको । अहिले दुई जनाभन्दा बढीको बा बन्ने मान्छे बहादुर नै मानिन्छ ।
यो वर्ष पनि बाहरुको सक्कली अनुहार यी ऑखाले हेर्न पाएनन् । फोटामै चित्त बुझाउनु पर्यो। बाको मुख हेर्ने दिन प्रत्यक्ष रूपमा हेर्न नपाएको धेरै भयो । यो बर्ष त मैले पनि बा बनेर मुख देखाउन पाएकक। बाहरुका अगाडि मुख लुकाउन नपरोस् । बाहरुको बुढेशकाल सुखमय बितोस् ।
